CLUN continúa apoiando e impulsando iniciativas que garantan o futuro da gandería galega e promovan o medio rural como unha contorna competitiva, innovadora, sostible e saudable para vivir. Neste contexto, a cooperativa CLUN e FEFRIGA, asinaron hoxe o convenio de colaboración polo que a cooperativa patrocina os concursos de novos manexadores e preparadores e a escola de xóvenes gandeiros.
No acto de sinatura, que tivo lugar na sede de CLUN en Ames, participaron o presidente de CLUN, José Ángel Blanco e o de AFRICOR LUGO e FEFRIGA, Manuel Sandamil. Estiveron acompañados polos presidentes de AFRICOR A Coruña e Pontevedra, Fernando Suárez y Jesús Manuel Manteiga. No caso de CLUN estará o director de Agrogandeira, Ángel Miranda, e a de Marketing, Jessica Rey, quen fixo unha presentación da cooperativa. Seguidamente o grupo fixo unha visita ás instalacións de CLUN.
O presidente de CLUN e de FEFRIGA coincidiron en valorar moi positivamente esta sinatura e a implicación de ambas entidades no asentamento de poboación no rural en Galicia: “queremos que os nosos fillos e netos, en moito casos, poidan seguir coa nosa actividade. Esperamos que esta sinatura continúe e se incremente nun futuro”, explicou Manuel Sandamil quen engadiu:” esperamos que esta aportación sirva para incrementar as actividades cos rapaces dende a Federación e así trasladarlles o gusto polo rural”. Precisamente neste sentir coincidiu co presidente de CLUN, Ángel Miranda, quen manifestou “o compromiso desta cooperativa co rural, co sector lácteo e con todo o sector primario galego. É importante para nós reivindicar o rural, que os xóvenes coñezan ben este traballo para construír unha canteira, en definitiva, un relevo xeracional”, de feito, o presidente lembrou que “son fillos de gandeiros e queremos axudarlles a que haxa futuro para eles nas explotacións”.
O relevo xeracional é un dos maiores retos que ten o sector gandeiro galego, xa que cada vez máis explotacións pechan as súas portas por falta de relevo xeracional tras a xubilacións dos seus propietarios. De feito, segundo datos de Eurostat, entre o 2005 e o 2020 pecharon en Galicia máis de 16.000 explotacións.
Por iso, a nosa cooperativa ten como un dos seus compromisos fundacionais a creación e apoio de proxectos e iniciativas que garantan o futuro do sector. Con iniciativas como a creación do primeiro ciclo superior de FP Dual en “Gandería e asistencia en Sanidade Animal”, en colaboración co IES de Melide, que está permitindo a formación de novos profesionais que garanten unha man de obra estable e cualificada. Esta facilitará a conciliación e permitirá lograr explotacións viables e máis competitivas no futuro. Outro exemplo é “Hábitat rural”, un proxecto solidario de CLUN e Ecos do Sur no que dez persoas migrantes seleccionadas por esta ONG participaron en formacións sobre muxido e fixeron prácticas en ganderías da cooperativas. Un programa que facilitou que catro desas persoas continúen a día de hoxe traballando nesas ganderías.
Convenio co Club de Xóvenes Gandeiros
Neste compromiso co futuro do campo galego e coa mocidade enmárcase o convenio asinado esta mañá, polo cal CLUN patrocinará os concursos de preparadores e manexadores que organice o Club de Xóvenes Gandeiros ao abeiro dos certames da Federación Frisona Galega (FEFRIGA) como xa foron o celebrado en Santa Comba e Muimenta e proximamente en Feiradeza. Uns torneos nos que participan mozos e mozas de idades comprendidas entre os 8 e os 25 anos.
A maiores, ambas entidades colaborarán na formación dos gandeiros e gandeiras do futuro a través da Escola de Xóvenes Preparadores, un campamento de verán que se desenvolve en Lalín e que ten como obxectivo formar ao redor de sesenta xóvenes gandeiros procedentes de toda Galicia. Coa súa participación neste campus, CLUN busca brindarlles a estes mozos e mozas os coñecementos prácticos esenciais para o coidado e manexo de animais, ofrecendo aos participantes unha experiencia formativa enriquecedora e ilusionante que contribúa ao desenvolvemento sostible do sector.