A cooperativa CLUN e ECOENER promoven un belén tradicional que poderá visitarse durante o Nadal en Santiago de Compostela.

• Situarase no Salón Nobre do Pazo de Raxoi, grazas ao apoio da Xunta de Galicia a esta iniciativa.

A cooperativa rural CLUN e a empresa de enerxías renovables ECOENER promoveron a instalación dun belén artesanal no Pazo de Raxoi de Santiago de Compostela, que poderá visitarse de maneira gratuíta desde o 29 de novembro de 2024 ata o 8 de xaneiro de 2025.

Esta iniciativa, impulsada por dúas empresas galegas comprometidas co medio rural e a sostibilidade, busca recuperar o espírito do Nadal, ao mesmo tempo que pon de relevo os valores da vida rural e o respecto pola natureza que ambas entidades defenden.

O belén, que ocupará 21 metros cadrados do Salón Nobre do Pazo de Raxoi, contou co apoio da Xunta de Galicia, que abre as portas das súas dependencias na Praza do Obradoiro, para que todos os cidadáns e turistas poidan achegarse a esta representación.

A recreación está composta por preto dunha centena de figuras artesanais e unha ambientación desenvolta por expertos belenistas. Nela trátase de reproducir con precisión as diferentes pasaxes arredor do nacemento de Xesús, así como tamén reflectir con detalle a vida no campo. Cada figura reflicte un profundo respecto polas tradicións e as orixes, amosando tamén o traballo de agricultores e gandeiros e a conexión coa natureza que tanto CLUN como ECOENER promoven.

Para os impulsores desta iniciativa, esta colaboración non é só unha oportunidade para conmemorar o Nadal, senón tamén para enviar unha mensaxe sobre a importancia de preservar valores fundamentais destas datas que deben de perdurar no tempo, como a solidariedade, o respecto e a xenerosidade, así como o amor e a paz.

Durante a presentación oficial do belén, celebrada no Pazo de Raxoi, estiveron o presidente da Xunta de Galicia, Alfonso Rueda; o conselleiro de Cultura, Lingua e Xuventude, José López Campos; Mª del Carmen Martínez, directora xeral de Patrimonio Cultural; o arcebispo de Santiago de Compostela, Francisco José Prieto; o presidente de ECOENER, Luis de Valdivia; o presidente de CLUN, José Ángel Blanco; o director xeral de CLUN, Juan Gallástegui e o vicepresidente de ECOENER, Fernando Rodríguez. Na súa intervención, o director xeral de CLUN, Juan Gallástegui, agradeceu a colaboración do goberno galego e destacou a importancia da iniciativa como unha forma de transmitir unha mensaxe de esperanza e unidade para enfrontar os desafíos actuais e próximos: “queremos mostrar que o futuro pasa por adaptarnos aos novos tempos sen perder de vista valores que xorden das nosas propias orixes, como a humildade, a cooperación e a esperanza”. Á súa vez, o presidente de ECOENER, Luis de Valdivia engadiu: “Co nacemento de Xesús, que reflicten beléns como o que presentamos hoxe. En Belén naceu a nosa cultura que supón liberdade de empresa e de emprendemento e a liberdade para asociarnos”.