CLUN crea unha cesta de Nadal en colaboración con outras nove Cooperativas Galegas

Máis de seiscentos traballadores destas organizacións están recibindo este agasallo como agradecemento ao seu esforzo durante todo o ano. Sentíndonos orgullosos do noso bo facer!

As outras cooperativas que se suman a esta proposta son a vitivinícola Viña Costeira; Milhulloa, dedicada ao cultivo ecolóxico de plantas medicinais; Embruxo, que produce aceite de oliva; a apícola Erica Mel; Tres Fuciños, produtores de porco celta; Amarelante, dedicada ao cultivo ecolóxico e sostible de castañas; Ribeiregas, cuxa actividade se centra na produción de alimentos ecolóxicos; e Terras da Mariña, especializados no cultivo e comercialización de fabas. Ademais, cóntase coa participación da correduría de seguros agraria Ucoga.

A presenza dos nosos produtos nesta cesta está centrada no noso leite solidario de FEIRACO coa figura do Apalpador, unha edición especial a través da cal contribuímos á reforestación dos montes queimados este verán na zona de Folgoso do Courel. Tamén incluímos o noso leite premium, leite ÚNICLA, con altos valores nutricionais derivados da alimentación natural das vacas dos nosos socios cooperativistas.

A través desta iniciativa queremos apostar polo valor dos produtos da terra, galegos e de cooperativas. Por en valor a calidade dos nosos produtos e tamén o esforzo que levan a cabo os socios de cada unha das cooperativas galegas.